കൃഷ്ണമണികളെ
വായിക്കുമ്പോൾ
കാലംതെറ്റിയ മഴ
കാടുകയറുന്നു.
നിന്റെ
മഴവിൽച്ചിറകിൽ ഒളിച്ച്
കൊടുങ്കാറ്റുകൾ
സുഷുപ്തമാവുന്നു.
കൃഷ്ണമണികളെ
വായിക്കുമ്പോൾ
കടങ്കഥകളിൽ നിന്നും കുട്ടികൾ
ഉത്തരങ്ങളായി
നടന്നു നീങ്ങുന്നു.
പുസ്തകത്താളുകളിൽ
അനാഥമായ ഓർമ്മകൾ
മയിൽപ്പീലികളായി
പുനർജ്ജനിക്കുന്നു.
കൃഷ്ണമണികളെ
വായിക്കുമ്പോൾ
സാരോപദേശകഥകളിലെ കൊറ്റികൾ
വേനൽച്ചൂടിൽ പെട്ട മത്സ്യങ്ങളെ
നിത്യതയിലേക്ക്
നാടുകടത്തുന്നു.
കൃഷ്ണമണികളെ
വായിക്കുമ്പോൾ
നമ്മൾ നടന്ന തീരങ്ങളിൽ തലതല്ലി
തിരകൾ വിസ്മൃതമാകുന്നു.
അന്നേരം
നിന്റെ
കൃഷ്ണമണികളിൽ നിന്നും
ഒരു മഹാസമുദ്രം
പിറവിയെടുക്കുന്നു.
No comments:
Post a Comment