കടൽ

ഇടയ്ക്കിടെ
വാതിലിൽ മുട്ടാറുണ്ട്
കാലൊച്ച കേൾപ്പിക്കാതെ
അരൂപിയായൊരു നിഴൽ..
ചില്ലുജാലകത്തിലൂടെ
പറന്നെത്താറുണ്ട്
മഞ്ഞച്ചിറകുള്ള നിശാശലഭം
ഞെട്ടറ്റു വീണ മഞ്ഞപ്പൂ പോലെ
വാടിത്തളർന്ന്...
നിന്റെ നെറ്റിത്തടത്തിൽ തെളിയാറുണ്ട്
അടർന്നു വീണ നക്ഷത്രംപോലെ
ഒരു സ്വേദ ബിന്ദു
ഒരു മഞ്ഞുതുള്ളിയിൽ
മയങ്ങി കിടക്കുന്ന ഉന്മാദം...
സൂര്യൻ..
അലയറുണ്ട് ഞാൻ
നിന്റെ ആകാശങ്ങളിൽ
വഴി തെറ്റിയ മേഘമായി
പെയ്തു തീരാറുണ്ട്
ചാറ്റൽമഴയായി
അപ്പോഴും കേൾക്കാറുണ്ട്
ഏതോ ഗന്ധർവൻറെ അശരീരി .
തിരയടിയ്ക്കാത്ത
നിന്റെ ഉൾക്കടലിൽ നിന്നും
തിരയൊടുങ്ങാത്ത
നിന്റെ തീരങ്ങളിൽ നിന്നും...