ഉടലടയാളങ്ങൾ

ചില നേരങ്ങളിൽ മിന്നുന്ന 

ഉടലടയാളങ്ങൾ 

കൊള്ളിയാൻ പെയ്യുന്ന ഓർമ്മകൾ, 

പെയ്യാറുണ്ട് ചില നേരങ്ങളിൽ 

തിരയിൽ വലിച്ചെറിഞ്ഞ മറവികൾ 

ചില നേരങ്ങളിൽ വാതിലിൽ മുട്ടാറുണ്ട് 

തിരയടിയിൽ എറിയപ്പെട്ടു

വഴി തെറ്റിയൊരു യാത്രികനെപ്പോലെ 

ഏകാന്തതയുടെ  കാവൽക്കാരൻ. 

ഉടലിലെ നക്ഷത്രങ്ങൾ കണ്ണടക്കാറില്ല 

അവ 

ഓർമകളായി  പെയ്യുന്നു നിന്നിൽ 

മരണമായി എന്നിലും.

ഇല പൊഴിക്കാറുണ്ട് കാലം 

വേരറുക്കാറുണ്ട് 

എന്നിട്ടും പൊടിക്കുന്നു നാമ്പുകൾ 

ചാരത്തിൽ നിന്നും 

ചിറകു വിടർത്തിയ  സ്വപ്‌നങ്ങൾ 

ചില നേരങ്ങളിൽ പെയ്യാറുണ്ട് 

കാലം തെറ്റിയ കല്പനകൾ 

അപ്പോഴും നമ്മൾ പെറുക്കിയെടുക്കാറുണ്ട് 

നക്ഷത്രക്കണ്ണുള്ള ആലിപ്പഴങ്ങൾ 

തിരുപ്പിറവിയുടെ വഴിയടയാളങ്ങൾ

കടൽ

ഇടയ്ക്കിടെ
വാതിലിൽ മുട്ടാറുണ്ട്
കാലൊച്ച കേൾപ്പിക്കാതെ
അരൂപിയായൊരു നിഴൽ..
ചില്ലുജാലകത്തിലൂടെ
പറന്നെത്താറുണ്ട്
മഞ്ഞച്ചിറകുള്ള നിശാശലഭം
ഞെട്ടറ്റു വീണ മഞ്ഞപ്പൂ പോലെ
വാടിത്തളർന്ന്...
നിന്റെ നെറ്റിത്തടത്തിൽ തെളിയാറുണ്ട്
അടർന്നു വീണ നക്ഷത്രംപോലെ
ഒരു സ്വേദ ബിന്ദു
ഒരു മഞ്ഞുതുള്ളിയിൽ
മയങ്ങി കിടക്കുന്ന ഉന്മാദം...
സൂര്യൻ..
അലയറുണ്ട് ഞാൻ
നിന്റെ ആകാശങ്ങളിൽ
വഴി തെറ്റിയ മേഘമായി
പെയ്തു തീരാറുണ്ട്
ചാറ്റൽമഴയായി
അപ്പോഴും കേൾക്കാറുണ്ട്
ഏതോ ഗന്ധർവൻറെ അശരീരി .
തിരയടിയ്ക്കാത്ത
നിന്റെ ഉൾക്കടലിൽ നിന്നും
തിരയൊടുങ്ങാത്ത
നിന്റെ തീരങ്ങളിൽ നിന്നും...