പനി

ഒരു മേശക്കു ചുറ്റും നമ്മൾ.
രണ്ടു പെട്ടി ചീട്ട്
നാല് ഗ്ലാസിൽ മദ്യം...
അവളൊരു പിഴ,
പെണ്ണുങ്ങൾ ഇങ്ങനെയുമോ?
ജാക്കി ഇറക്കി ഒന്നാമന്റെ
വാക്കുകൾ കൊഴുക്കുന്നു. 
പനിക്കോളിൽ അവളെ
പാതിരാശയ്യയിലേക്കു
വലിച്ചിട്ടവനല്ലേ കുറ്റക്കാരൻ?
ഏഴാംകൂലിയിറക്കിയ രണ്ടാമൻ
സമസ്യ പൂരിപ്പിക്കുന്നു
എന്തായാലും അവൾക്കും കിട്ടി പനി
ഒമ്പതിറക്കിയ മൂന്നാമൻ
ചിരിയടക്കാൻ പാടുപെടുന്നു.
ഇനിയവർ ഐസൊലേഷൻ വാർഡിലും...
വായിൽ പുകയിലച്ചാറുപോലെ അശ്ലീലവുമായി 
നാലാമൻ ജോക്കറിറക്കുന്നു.
നുരയുന്ന ചഷകത്തിന്
ആർപ്പു വിളിച്ച്
കളി  രണ്ടാം റൗണ്ടിൽ എത്തുമ്പോൾ
ഒന്നാമന്റെ ഫോൺ മുഴങ്ങുന്നു
ഭാര്യയുടെ പരിഭ്രാന്തി....
മോൾക്ക് പനിക്കുന്നു.
കണ്ടുനിന്നവൻ
'അവളും?' എന്ന ചോദ്യംകൊണ്ട്
തന്നെ ജോക്കറിട്ടു വെട്ടും മുന്നേ,
നുരയുന്ന മൗനം ഒറ്റ വലിക്കു കുടിച്ച്
അവൻ പടിയിറങ്ങുന്നു.
സന്ധ്യമയങ്ങിയ തെരുവിൽ
ആംബുലൻസിന്റെ സൈറൺ  മുഴങ്ങുന്നു
പനിക്കിടക്കയിൽ നഗരം
കമ്പിളിപുതച്ചു കിടക്കുന്നു.
ഒരു കൈ കളിച്ചാലോ ?
മൂന്നുപേർ കാഴ്ചക്കാരനോട് ചോദിക്കുന്നു.